Flugvél Icelandair snúið við til Keflavíkur eftir að brunaboði fór í gang

Flugvél Icelandair sem tók af stað til Berlínar í morgun var snúið við skömmu eftir flugtak. Viðbúnaður var ræstur út á Keflavíkurflugvelli í samræmi við verklagsreglur en vélin lenti heilu og höldnu á vellinum á níunda tímanum. RÚV greindi fyrst frá.

Guðjón Helgason upplýsingafulltrúi Isavia staðfestir í samtali við Vísi að ósk hafi komið frá flugstjóra um að snúa vélinni við. Hún hafi ekki verið lengi í loftinu þegar boðið barst.

Í samræmi við viðbragðsáætlanir hafi verið virkjað rautt viðbúnaðarstig á flugvellinum og slökkvilið og sjúkraflutningafólk kallað út.

Ekki náðist í Ásdísi Ýri Pétursdóttur upplýsingafulltrúa Icelandair við vinnslu þessarar fréttar en hún segir í samtali við RÚV að brunaboði hafi verið í gang í flugvélinni og því ákveðið að snúa við til Keflavíkur. Þá hafi væg reykjarlykt fundist um borð við lendingu en engin hætta hafi verið á ferð.

Farþegar og áhöfn hafi verið flutt í aðra vél sem fari til Berlínar nú rúmlega níu.