Viktor Gísli: Treysti á sjálfan mig

Viktor Gísli Hallgrímsson var valinn maður leiksins þegar Ísland laut í lægra haldi fyrir Noregi, 31-28, í milliriðli II á EM 2020 í dag.

Viktor lék stærstan hluta leiksins og varði 15 skot, þar af tvö vítaköst.

„Við unnum okkur inn í leikinn í seinni hálfleik og vorum nálægt því að minnka muninn í tvö mörk. Þá hefði þetta orðið leikur,“ sagði Viktor í samtali við Vísi eftir leik.

„Ég fann mig ekki alveg í byrjun. Það láku nokkur skot inn og vörnin hélt ekki. Svo kom sjálfstraustið.“

Viktor hefur stimplað sig inn á EM sem framtíðarmarkvörður íslenska liðsins.

„Ég spila bara minn leik, treysti á sjálfan mig og þá gerast góðir hlutir,“ sagði Viktor.

Hann varði tvö vítaköst í leiknum og hefur alls varið sjö víti á EM, flest allra markvarða á mótinu.

„Ég hef aldrei varið svona mörg víti,“ sagði Viktor og glotti.

Hann nýtur þess að spila á stærsta sviðinu, á móti bestu leikmönnum Evrópu.

„Þetta er geggjað, að fá mínútur og að gera mistök. Þá kemur sjálfstraustið,“ sagði Viktor að lokum.