Inga segir Vinstri græn hafa svikið blóðmerarnar

Svandís Svavarsdóttir matvælaráðherra hefur gefið út reglugerð, að fengnu áliti starfshóps sem hún skipaði, sem leyfir blóðmerahald til næstu þriggja ára. Inga Sæland, formaður Flokks fólksins, hefur barist með kjafti og klóm gegn þessari starfsemi og lagt fram frumvarp þar sem gert er ráð fyrir því að bann verði lagt við því að taka úr fylfullum hryssum blóð.

Telur starfshópinn vanhæfan að hluta

Blóðmerahald komst á dagskrá eftir að svissnesk dýraverndunarsamtök birtu myndbandsupptökur sem sýna hversu harkalega er gengið fram við blóðtökuna. Inga var gestur í Reykjavík síðdegis í gær þar sem hún fordæmdi reglugerð Svandísar. Hún dró ekki af sér frekar en fyrri daginn í lýsingum á þessari umdeildu starfsemi og átaldi harðlega framgöngu Vinstri grænna í leiðinni.

Að sögn Ingu er Ísland eina landið í Evrópu þar sem blóðmerahald er leyft og að um heiminn séu aðeins þrjú lönd önnur sem leyfa starfsemi sem Inga segir að þverbrjóti öll dýraverndunarsjónarmið. Og til hvers: Svo hægt sé að framleiða PMSG-hormón sem einkum er notað í verksmiðjubúskap í svínarækt: 

„Svo við getum étið meira beikon,“ 

sagði Inga og benti á að hliðstætt efni og PMSG væri nú framleitt í líftækniiðnaði.

Inga segir eins og við mátti búast að henni lítist ekki á reglugerðina sem leyfir blóðmerahald til þriggja ára en hún þurfi þó ekki að koma á óvart miðað við hvernig starfshópur Svandísar var saman settur. Að sögn Ingu voru þar innanborðs bæði fólk sem er hlynnt starfseminni og hefur af henni beinan hag. Sem ætti að leiða til vanhæfis.

Ætla að tala gegn eigin frumvarpi

Inga rifjaði upp að aldrei hafi annað eins magn af umsögnum borist við nokkurt frumvarp og blóðmerafrumvarp sitt eða um 400. Í flestum tilfellum til að styðja frumvarpið og fordæma starfsemina. Í fyrstu lotu umsagna mæltu ýmsir gegn frumvarpinu en það átti eftir að breytast eftir að myndbandsupptökurnar litu dagsins ljós.

„Þetta átti að vera aðalmál Flokks fólksins en aðilar sem eru með okkur á málinu í Vinstri grænum neita að taka málið inn og myndu ekki greiða með því atkvæði. Þetta er stórkostlegur fíflagangur að þykjast vilja vera eitthvað allt annað en þú ert, þykjast vera með einhverju máli en berjast svo gegn því að það verði tekið fyrir og segjast ætla að greiða gegn því atkvæði. Þrátt fyrir að þú viljir bann við blóðmerahaldi! Hver skilur svona? Óskiljanlegt. En þetta er víst pólitík,“ segir Inga.

Tveir þingmenn Vinstri grænna eru meðflutningsmenn á frumvarpinu, þau Orri Páll Jóhannsson þingflokksformaður og Jódís Skúladóttir. Búið er að mæla fyrir því öðru sinni. Inga fullyrti að Orri Páll hafi haldið því fram í hennar eyru fullum fetum að hann myndi vinna gegn framgangi málsins, að það yrði tekið fyrir á þessu þingi og greiða atkvæði gegn því.