Kallar eftir neyðarlögum um leigufélög og myndarlegri aðkomu ríkisins

Eftir hádegi hófst fundur samflots iðn- og tæknifólks, VR, LÍV með Samtökum atvinnulífsins hjá ríkissáttasemjara. Ragnar Þór Ingólfsson, formaður VR, segir að verkalýðshreyfingin hafi lokið mikilli undirbúningsvinnu og að hann sé tilbúinn í viðræður.

„Það skýrist vonandi fljótlega hvort það sé samningsvilji til að klára skemmri samning. Og ég get ekki sé að það ætti að taka lengri tíma en daginn í dag og jafnvel morgun að sjá hvort það sé einhver flötur í að reyna að landa þessu.“

Á Facebook í gær sagði Ragnar frá konu á sjötugsaldri sem sér sig tilneydda til að segja upp samningi sínum við Ölmu leigufélag því leigan mun hækka um sjötíu og fimm þúsund krónur í byrjun febrúar. Ragnar segir að fólk á leigumarkaði annars vegar og fólk með lán með breytilegum vöxtum hins vegar sé í svo slæmri stöðu að vandinn sé mun stærri en svo að kjarasamningar einir og sér dugi til.

„Ég get ekki séð annað en að stjórnvöld verði að koma með eitthvað út til þess að við getum bara hreinlega gengið frá kjarasamningi, þetta verður að hanga saman annars náum við aldrei utan um þennan vanda og þessari linnulausu græðgi sem er í gangi í okkar samfélagi sérstaklega hjá ákveðnum leigufélögum og ég tek það fram að það eru ekki öll leigufélög sem haga sér með þessum hætti að það þarf að koma lögum yfir þessa starfsemi fljótt og vel, hvort sem það verði gert með einhverjum neyðaraðgerðum eða slíkt. Ég bara kalla eftir neyðarlögum á starfsemi Ölmu sem gæti þá talað mjög sterkt inn í þá vinnu sem við erum að fara af stað með núna í hádeginu.“

Áttu þá við að þú viljir að einhvers konar leigubremsa verði innleidd?

„Já, en það er alveg ljóst að Sjálfstæðisflokkurinn hefur barist mjög harkalega gegn því að lögum verið komið yfir leigumarkaðinn sem gæti þá varnað því að fólk lendi í þessari stöðu eins og hún Brynja að fá á sig hækkun í einu vetfangi upp á sjötíu og fimm þúsund krónur. Til þess að setja það í samhengi þá þarf ég að semja um 133 þúsund króna launahækkun til að standa undir þessum eina kostnaðarauka sem hún verður fyrir og þá er allt annað eftir og þá er ég að tala um gjaldskrárhækkanir og hækkanir á nauðsynjavörum. Þannig að stjórnvöld geta ekki skorast undan ábyrgð í þessu máli. Þau eru búin að hafa núna nokkur ár til að bregðast við, það er búið að setja á fót tvo starfshópa um aðgerðir í húsnæðismálum sem hafa verið að fjalla einmitt um leigumarkaðinn og staðan er einfaldlega sú að það hafa komið fram margar tillögur um hvað hægt sé að gera en það gerist ekki neitt þannig að stjórnvöld geta ekki fríað sig ábyrgð. Þessi staða hjá þessari konu og þúsundum annarra á leigumarkaði eru á ábyrgð stjórnvalda og þau þurfa að svara því núna og svara því strax, hvað ætla þau að gera?“

Ríkisstjórnin verði að liðka fyrir samningum og hann kallar eftir svörum.

„Þú hlýtur að sjá ómöguleikann í því þeirri vinnu sem við erum að vinna á vettvangi vinnumarkaðarins að ef við ætlum að taka allan þennan kostnað beint inn í okkar kröfu, við erum bara í ómögulegri stöðu.“

Rætt var við Ragnar fyrir hádegi. Skömmu eftir hádegi vísaði stéttarfélagið Efling kjaradeilu sinni við Samtök atvinnulífsins (SA) til ríkissáttasemjara. Formaður Eflingar segir það óhjákvæmilega aðgerð.