Ríkið samdi við hjúkrunar­fræðinga

Líkt og aðrir kjarasamningar sem skrifað hefur verið undir nýlega er samningurinn til tólf mánaða. Hann gildir frá 1. apríl 2023 til 31. mars 2024. 

Í tilkynningu á vef Félags íslenskra hjúkrunarfræðinga kemur fram að samningurinn sé í takt við áherslur sem félagið lagði upp með við upphaf viðræðna við ríkið. Hann feli í sér breytingar á vaktaálagi og vaktahvata auk verkáætlunar um atriði sem verða tekin til sérstakrar skoðunar á samningstímanum. Þar á meðal eru vinnutími í dagvinnu og vaktavinnu, endurskoðun veikindakafla samningsins og fleira.

Rafræn atkvæðagreiðsla fer fram um samninginn og hefst hún á hádegi laugardaginn 15. apríl. Henni lýkur á hádegi mánudaginn 24. apríl. Aðeins hjúkrunarfræðingar með fulla aðild að félaginu geta greitt atkvæði.

Atkvæðagreiðsla um nýgerðan kjarasamning hjúkrunarfræðinga við Reykjavíkurborg hefst á á föstudag, 14. apríl. Samningaviðræður við önnur sveitarfélög og Samtök fyrirtækja í velferðarþjónustu standa enn yfir.