Fá sekt vegna dulinna auglýsinga

Í ákvörðun Fjölmiðlanefndar eru tildrög málsins rakin. Segir þar að ábending hafi borist Fjölmiðlanefnd þar sem vakin var athygli á duldum auglýsingum sem mætti finna í LXS-þáttunum. 

Við ákvörðun sektar, sem nemur 500 þúsund krónum, var litið til þess að Sýn hafi áður gerst brotlegt gegn lögum um fjölmiðla sem kveða á um dulin viðskiptabrot.

Í ákvörðun Fjölmiðlanefndar eru brotin talin upp. Í þáttunum er minnst á ýmis fyrirtæki, svo sem World Class, Glamista hair hárlenginamerki, Marc Inbane brúnkukrem og bílaumboðið Heklu.

„Á meðan áhrifavaldurinn situr í bílnum og lætur fyrrgreind ummæli falla eru sýndar nærmyndir af bílnum frá nokkrum hliðum. Þar á eftir fer hún í „Audi-salinn“ hjá Heklu til að kíkja á „GT Audi“ 4 rafmagnsbílinn sem áhrifavaldurinn segist ekki vera „neitt eðlilega spennt“ fyrir,“ segir um eitt innslagið í ákvörðuninni.

Við upphaf innslaganna birtist textinn „ekki kostuð auglýsing“ með hástöfum í um fimm sekúndur í vinstra horni skjásins. 

Byggist á raunverulegu lífi

Fram kom í svörum Sýnar til Fjölmiðlanefndar að einu kostendur þáttanna væru World Class og Hagkaup en að öðru leyti hafi Sýn ekki hlotið greiðslur eða hlunnindi vegna vörumerkja sem voru nefnd í þáttunum.

„Við erum enn þá að skoða þetta mál, við höfum átt langt samtal við Fjölmiðlanefnd út af þessu máli. Þau vilja meina að þetta séu duldar auglýsingar en við erum bara með raunveruleikaþátt sem byggir á því að fylgja fólki í þeirra lífi og störfum. Þá getur það gerst að það birtast einhver fyrirtæki eða annað slíkt í bakgrunni. Það var í engu tilfelli í þessari þáttaröð sem við fengum greiðslu, sem mér skilst að Fjölmiðlanefnd vill meina að hafi gerst,“ segir Þóra Björg Clausen dagskrárstjóri Stöðvar 2 í samtali við Vísi. 

„Við erum að fylgjast þarna með, til dæmis, Birgittu Líf sem er að starfa í World class og raunveruleikaþáttaformið byggir á því að við fylgjumst með þeim í þeirra raunverulega lífi.“

Þóra segir að há sektin sé blaut tuska í andlitið. 

„Það er stutt síðan Rúv var talið brotlegt fyrir að auglýsa verslun sem selur eingöngu nikótínpúða en slapp við sekt. Væntanlega þar sem það er fyrsta mál sem tengist nikótínpúðum en það er langt því frá fyrsta brot þeirra. Í jafn erfiðu samkeppnisumhverfi og við erum er ákveðinn skellur að einkareknu fjölmiðlarnir séu teknir svona fyrir en farið, að því er virðist, aðeins mýkri höndum um ríkisfjölmiðilinn,“ segir Þóra Björg.

Vísir er í eigu Sýnar.