Hvetja fólk til að taka verð­merkingum í Hag­kaup með fyrir­vara

Í tilkynningu frá ASÍ segir að rangmerkt verð hafi oftast verið að finna á finna á pappírsverðmiðum í Hagkaup, en þó ekki eingöngu þar. Þetta er niðurstaða greiningar á gögnum sem verðlagseftirlit ASÍ hefur aflað undanfarnar vikur en þau fara í hverri viku í verslanir til að afla gagna.

Í tilkynningu segir að við athugun á verðgögnum eftirlitsins frá aprílbyrjun hafi mátt finna mörg dæmi um tvö verð í sömu verslun sama dag. Langoftast var þar um Hagkaupsverslun að ræða. Eftirfarandi dæmi má nefna um tví-verðmerktar vörur:

• Engifer, Hagkaup Spönginni: 1.399 krónur og 1.599 krónur.

• Dökkt sykurlaust Valor súkkulaði, Hagkaup Smáratorgi: 419 krónur og 479 krónur.

• Þristaterta, Hagkaup Kringlunni: 2.239 krónur og 2.499 krónur.

• Móðir Náttúra indverskar pönnukökur, Hagkaup Kringlunni: 1.499 krónur og 1.579 krónur.

Nokkrir tugir annarra vara fundust, til dæmis fleiri vörur frá Valor, aðrar frá Nóa Síríus, Kjörís Hlunkar, Ítalía Pestó og svo framvegis. Eins og gefur að líta er hér um alls kyns flokka að ræða og lítið mynstur annað en að yfirleitt er um pappírsmerkingar að ræða á að minnsta kosti öðru verðinu.

Sektir hafi ekki dugað

Í tilkynningu ASÍ segir að verðmerkingum Hagkaups hafi verið ábótavant lengi. Neytendastofa hafi framkvæmt athugun í nokkur skipti í fyrra í verslunum Hagkaups í Skeifunni og Kringlunni á tímabilinu febrúar til maí. Í júní hafi stofnunin beint þeim tilmælum til þeirra að koma verðmerkingum í rétt horf. Fyrirtækið var sektað um 150 þúsund krónur.

„Sektir Neytendastofu í þessum tveimur málum námu 150.000 krónum, en það hefur ekki dugað til, því enn eru verðmerkingar óviðunandi í Hagkaupsverslunum. Verðlagseftirlitið brýnir því fyrir fólki að taka verðmerkingum í Hagkaup með fyrirvara og athuga sérstaklega við kassann hvort rétt verð sé rukkað,“ segir að lokum í tilkynningu ASÍ.