For­dæma notkun „ó­mann­úð­legra“ minka­gildra

Þetta skrifar hún í færslu fyrir hönd stjórnar samtakanna sem var birt á síðu Villikatta á Facebook fyrr í dag. Þar segir Jacobina að Villikettir hafi fengið símtal frá manni við Sorpu í Gufunesi. Þar hafi leitað til hans kisa með minkagildru fasta um fótinn á sér.

Jacobina segir kisuna hafa verið í lífshættu og að fóturinn sé mölbrotinn og þurfi að fjarlægja hann.

„Enn einu sinni slasast kisa lífshættulega vegna minkagildru sem sett er út af meindýraeyði, eftirlitslaus og óvarin gildra svo önnur dýr komast í hana. Gildran var fest niður með bandi sem kisa gat slitið og þar sem þetta er gæf kisa þá leitaði hún sér hjálpar hjá mannfólkinu. Ef um vergangs- eða villikött hefði verið að ræða þá hefði hann falið sig og dáið hægum, kvalarfullum dauðdaga af sárum sínum,“ segir Jacobina.

Jacobina segir að þessu verði að breyta og að það séu til mannúðlegri leiðir til að glíma við minka- og villikattavanda.