Maxwell boðuð á fund með full­trúum Trump-stjórnarinnar

Blanche og Maxwell munu hittast í dag á skrifstofu saksóknara í Tallahassee í Flórídaríki Bandaríkjanna, samkvæmt heimildamanni CNN. Miðillinn greinir enn fremur frá því að lögmaður Maxwell hafi sést ganga inn í bygginguna síðdegis í dag.

Sjá einnig:  Trump látinn vita að nafn hans væri í Epstein-skjölunum

Gerist þetta skömmu eftir að dómsmálaráðuneyti Bandaríkjanna hafði samband við Maxwell í von um að fá fund með henni.

Blanche sagði í gær að alríkislögreglan (FBI) og dómsmálaráðuneytið vildi komast í upplýsingar sem Maxwel gæti hugsanlega haft um þá sem brotið hafa á fórnarlömbum Epsteins.

Nafn Trumps í Epstein-skjölunum

Á sama tíma hafa margir stuðningsmenn Donalds Trumps Bandaríkjaforseta krafist frekari upplýsinga um Epstein en í gær var greint frá því að Trump hafi verið upplýstur í vor um að nafn hans birtist í skjölum sem tengdust Jeffrey Epstein.

Þingnefnd fulltrúadeildarinnar ákvað óvænt í dag að stefna dómsmálaráðuneytinu um að það efhenti skjöl tengd Epstein. Nefdin er sögð gera þetta í óþökk þingforsetans Mike Johnson, repúblikana.

Dómari hafnaði í gær beiðni dómsmálaráðuneytisins sem hafði farið þess á leit að leynd yrði lyft af vitnisburði kviðdóms í málsókn gegn Epstein.

Trump hefur reynt eftir bestu getu að gera lítið úr málinu en frekari upplýsingar um vinasamband þeirra Epsteins hafa komist í ljós á síðustu dögum, m.a. dónalegt afmæliskort sem Trump sendi Epstein á hverju stóð: „Til hamingju með afmælið [...] og megi allir dagar vera annað dásamlegt leyndarmál“.

Hver er Ghislaine Maxwell?

Breska athafnakonan Ghislaine Maxwell er fyrrverandi kærasta og síðar samstarfskona Jeffrey Epstein. Epstein lýsti Maxwell sem bestu vinkonu sinni í viðtali við Vanity Fair árið 2003.

Maxwell var dæmd árið 2022 í tuttugu ára fangelsi fyrir að hafa tekið þátt í samsæri með Epstein um að tæla og misnota ólögráða stúlkur kynferðislega. Hún hefur reynt að áfrýja dómnum.

Talið er að Maxwell og Epstein hafi slitið sambandi sínu á tíunda áratugnum en hún hélt þó nánum tengslum við kynferðisbrotamanninn dæmda, sem átti yfir höfði sér ákæru vegna mansals og annarra brota þegar hann lést í fangelsi árið 2019. Samsæriskenningar hafa síðan þá fengið að grassera um hvort hann hafi í raun verið myrtur en samkvæmt krufningsskýrslu framdi hann sjálfsvíg.

Sjá einnig: Epstein mætti í brúðkaup Trumps

Nafn Maxwell var oft nefnt í dómsskjölum í máli Epsteins þar sem sagt var að hún hefði hjálpað til við að útvega ólögráða stúlkur fyrir hann og aðra valdamikla einstaklinga. 

Á myndefni sem nýlega var gert opinbert má sjá Maxwell, Trump, Epstein og Andrés prins sækja góðgerðarviðburð í Mar-a-Lago.

Maxwell var handtekin í New Hampshire í júlí 2020 eftir að hafa horfið sjónum í kjölfar handtöku Epsteins sumarið áður.