Coote á­kærður fyrir að fram­leiða barnaníðsefni

Coote er ákærður fyrir að hafa þann 2. janúar árið 2020 framleitt barnaklám í flokki A, sem er alvarlegasti flokkur slíkrar ákæru og sýnir yfirleitt fullorðinn einstakling misnota barn. 

Hann var handtekinn og ákærður fyrir mánuði en mætir í dómsal í fyrsta sinn á morgun, eins og breska lögreglan staðfesti við Nottingham Post.

Coote var vikið frá störfum í desember síðastliðnum eftir að hafa starfað sem dómari í ensku úrvalsdeildinni um árabil.

Hann lenti fyrst í vandræðum þegar myndband af honum birtist á netinu þar sem hann kallaði Jurgen Klopp, þáverandi knattspyrnustjóra Liverpool, ljótum nöfnum.

Aðeins tveimur dögum síðar birtist annað myndband á netinu þar sem Coote sást sjúga kókaín á hóteli í ferð á vegum UEFA.

Fyrir vikið fékk hann viðurnefnið „Cocaine Coote“ í breskum fjölmiðlum.

Þegar rykið fór að setjast nokkrum vikum síðar steig Coote sjálfur fram, greindi frá því að hann væri samkynhneigður og hefði átt í erfiðleikum andlega sem leiddu hann til eiturlyfjanotkunar.

Coote var rekinn úr ensku úrvalsdeildinni og dæmdur í átta vikna bann frá dómarastörfum þar í landi. Auk þess var hann dæmdur í bann af UEFA frá öllum dómarastörfum, sem gildir til 30. júní á næsta ári.

Hann hafði mögulega hugsað sér að taka þá aftur upp flautuna, en úr því verður augljóslega ekki ef hann er dæmdur fyrir að framleiða barnaníðsefni.