Ungir Sjálf­stæðis­menn fengu sér á­fengi í ferð með Vil­hjálmi og fóru svo á kjör­stað

Logi Þór Ágústsson, formaður félagsins, og Hermann Borgar Jakobsson varaformaður eru nánir stuðningsmenn Vilhjálms sem er jafnframt þingmaður Sjálfstæðisflokksins.

Í ferðinni voru fyrirtæki og uppbyggingarsvæði heimsótt í Helguvík. Vísindaferðin var haldin af áðurnefndum formanni og varaformanni „fyrir hann Vilhjálm,“ að sögn Loga. 

Hann segir að áfengið í ferðinni hafi verið í boði hans og varaformanns ungliðahreyfingarinnar. Þá hafi fólk sem neytti veiganna verið „með lögaldur eftir minni bestu vitund.“ Samkvæmt lögum Sambands ungra Sjálfstæðismanna (SUS) er ungmennum niður í fimmtán ára aldur heimilt að skrá sig í undirfélög á borð við Heimi. 

Vilhjálmur Árnason hefur ekki svarað fyrirspurn fréttastofu um málið.

Gott að virkja ungt fólk

Logi segir að 52 ungir Sjálfstæðismenn hafi mætt í ferðina og rúta lagt af stað frá kosningamiðstöð Vilhjálms. Eftir heimsóknina í Helguvík hafi rúta komið við í Grófinni í Reykjanesbæ þar sem nú er hægt að greiða atkvæði í leiðtogaprófkjörinu í Reykjanesbæ en Vilhjálmur er þar einn þriggja frambjóðenda.

„Á leiðinni til baka úr Helguvík vildu nokkrir nýta tækifærið og kjósa utankjörfundar þar sem það var í leiðinni. Rúmlega 10 manns af þeim 50 gerðu það,“ segir Logi. „Það finnst mér frábært enda nauðsynlegt fyrir Sjálfstæðisflokkinn að virkja ungt fólk.“

Hjólaði í forvera sinn

Vísir hafði samband við Guðna Ívar Guðmundsson, sem er skráður formaður Heimis á vef SUS, en sá upplýsti fréttamann um það að áðurnefndur Logi hafi tekið við formennsku. Þegar fréttamaður hringdi í Loga til að spyrja hann um ferðina í gær vildi hann lítið segja í fyrstu og óskaði eftir skriflegri fyrirspurn. Í stað þess að svara fréttamanni beint birti hann færslu um málið á Facebook-síðu sinni þar sem hann sakaði Guðna, fyrrverandi formann, um að siga fréttamanni á sig.

„Væntanlega í þeim tilgangi að gera hana tortryggilega og ná höggi á Vilhjálm Árnason,“ ritar Logi og segir áðurnefndan Guðna vera í kosningastjórn annars frambjóðanda í Reykjanesbæ.

Þess ber að geta að fréttamaður upplýsti Guðna ekki um efni erindisins áður en hann óskaði eftir því að komast í samband við núsitjandi formann félags ungra Sjálfstæðismanna í Reykjanesbæ. Logi hefur verið upplýstur um þetta en hafði ekki leiðrétt færslu sína þegar fréttin fór í birtingu. 

„Ég mun ekki fóðra andstæðinga Sjálfstæðisflokksins eða stuðningsmenn annarra framboða – sem leggjast svona lágt – með efni með því að tjá mig frekar. Ég vona að aðrir frambjóðendur hafi ekki með beinum hætti komið að þessari ömurlegu árás á unga fólkið sem hefur áhuga á því að taka þátt í starfinu,“ segir Logi jafnframt.

Hann telur að um hafi verið að ræða eina fjölmennustu vísindaferð sem haldin hafi verið af ungu fólki í Reykjanesbæ.