Andri Lucas svaraði fautaskap með marki

Andri Lucas byrjaði á meðal varamanna Blackburn í leik dagsins en kom inn á 70. mínútu í stöðunni 2-1 fyrir Blackburn.

Þegar komið var fram á þriðju mínútu uppbótartíma venjulegs leiktíma innsiglaði hann 3-1 sigur liðsins með laglegu skoti í fjærhornið sem Max Crocombe í marki Millwall tókst ekki að koma í veg fyrir að færi í netið.

Markið var sætt í meira lagi því ekki svo löngu fyrir það hafði Mark Sykes, leikmaður Millwall, tekið harkalega á Andra Lucasi og fengið að launum gult spjald fyrir.

Lokatölur 3-1 sigur Blackburn Rovers og þriðja mark Andra Lucasar í ensku B-deildinni á tímabilinu. Blackburn er sem stendur í 15. sæti ensku B-deildarinnar með 8 stig eftir sjö leiki.

Brotið á Andra Lucasi og markið sem hann skoraði má sjá í spilaranum hér fyrir neðan.