Mun mæta fyrir dóm eftir ofsaakstur

Atvikið gerðist í apríl á þessu ári þar sem Pickford var stöðvaður af lögreglunni eftir að hafa ekið óvarlega og verið nálægt því að klessa á tvo aðra bíla. Lögreglumaður varð vitni að atvikinu og ætlaði að stöðva bifreiðina, sem var af gerðinni Lamborghini. Þá brunaði Pickford í burtu á bílnum og þurfti lögreglumaðurinn að elta hann.

Þegar Pickford var ljóst að lögreglan væri á eftir honum stoppaði hann bifreiðina og viðurkenndi sök sína. Samkvæmt vitnisburði lögreglunnar keyrði Pickford mjög hratt eftir að aðrir bílar höfðu þurft að nauðhemla til að koma í veg fyrir árekstur.

„Ég kveikti á ljósum og sírenum og tók eftir því að ég var að keyra á 80 kílómetra hraða en bíllinn sem ég var að elta var að stinga mig af. Á veginum sem við vorum að keyra var aðeins 50 kílómetra hámarkshraði,“ er haft eftir lögreglumanninum í dómskjölum.

Pickford játaði sig strax sekan en mun mæta fyrir dóm til þess að færa rök fyrir vægari refsingu.