Gerrard: Sýndum þolinmæði og hún skilaði sér í sigri

„Þeir voru erfiðir að eiga við en það kom okkur svo sem ekkert á óvart. Við sýndum þolinmæði og hún skilaði sér í sigri," sagði fyrirliðinn Steven Gerrard hjá Liverpool eftir nauman 1-0 sigur liðsins gegn Unirea Urziceni í fyrri leik liðanna í 32-liða úrslitum Evrópudeildar UEFA á Anfield-leikvanginum í kvöld.

Gerrard er sannfærður um að Liverpool geti farið alla leið og unnið þessa keppni en viðurkennir að það verði erfitt verkefni.

„Evróupudeildin er nú full af frábærum liðum sem voru að detta út úr Meistaradeildinni þannig að við vitum að þetta verður erfitt en höfum þó trú á því að við höfum það sem þarf til þess að vinna þessa keppni," sagði Gerrard í leikslok í kvöld.