Zamora tæpur fyrir leikinn gegn Hamburg

Bobby Zamora gat ekki æft með Fulham í dag og er sagður afar tæpur fyrir leik liðsins gegn Hamburg í undanúrslitum Evrópudeildarinnar á morgun.

Fyrri leik liðanna í undanúrslitunum lauk með markalausu jafntefli í Þýskalandi en Zamora missti af leik Fulham gegn Everton um helgina.

„Það er verið að huga að Bobby en ég er ekki vongóður um að hann verði tilbúinn fyrir leikinn," sagði Roy Hodgson, stjóri Fulham, á heimasíðu félagsins.

Hogdson gat hins vegar leyft sér að hvíla marga leikmenn um helgina en Fulham á nú möguleika á að koma sér í úrslitaleik í Evrópukeppni í fyrsta sinn í sögu félagsins.