Lék tveimur skjöldum og fékk nítján ára dóm

Fyrrverandi útsendari Bandarísku leyniþjónustunnar, CIA, var í dag dæmdur í nítján ára fangelsi fyrir að leggja á ráðin um njósnir fyrir yfirvöld í Kína. Á árunum 2010 til 2012 voru um tuttugu útsendarar Bandaríkjanna í Kína fangelsaðir eða teknir af lífi - aðgerðir sem raktar eru til svika umrædds útsendara.

Útsendarinn heitir Jerry Chun Shing Lee og er 55 ára. Hann hætti hjá leyniþjónustunni árið 2007 eftir þrettán ár í starfi og var í kjölfarið ráðinn til starfa hjá útsendurum kínversku ríkisstjórnarinnar í Hong Kong, að því er segir í frétt breska ríkisútvarpsins BBC. Lee var þannig greitt fyrir að leka upplýsingum um þjóðaröryggismál Bandaríkjanna til kínverskra yfirvalda.

Sjá einnig: Handtaka varpar ljósi á lamaða starfsemi CIA í Kína

Saksóknarar héldu því fram Lee hefði þegið hundruð þúsundir Bandaríkjadala fyrir að láta í té umræddar upplýsingar. Hann hafi raunar lekið öllu sem hann komst á snoðir um á þrettán ára leyniþjónustuferli sínum til kínverskra embættismanna.

Lee játaði við réttarhöld í maí síðastliðnum að hafa lagt á ráðin um að leka slíkum upplýsingum í þágu erlends ríkis. Lögmenn hans héldu því hins vegar fram að brotin væru ekki jafnumfangsmikil og saksóknari vildi vera láta. Þannig hefði aldrei verið hægt að rekja slóð peninganna, sem lagðir voru inn á reikninga hans, til kínverskra embættismanna og þá hefði heldur ekki tekist að sanna að hann hafi lagt á ráðin um að leka hernaðarleyndarmálum.

Hélt utan um nöfn og símanúmer útsendara

Brot Lee eru rakin til ársins 2010, þegar kínverskir leyniþjónustumenn eru fyrst sagðir hafa sett sig í samband við hann. Árin 2010 til 2013 voru háar fjárhæðir lagðar inn á bankareikninga hans í Hong Kong.

Á meðal gagna málsins er jafnframt skjal sem Lee setti saman, með lykilupplýsingum um starfsemi bandarísku leyniþjónustunnar. Hann hélt til að mynda utan um rétt nöfn og símanúmer bandarískra útsendara. Lee var loks handtekinn á JFK-flugvelli í New York-borg í janúar árið 2018.

Í frétt BBC segir að með hjálp Lee hafi Kínverjum tekist að uppræta stórtækt net bandarískra útsendara í Kína á árunum 2010 til 2012. Talið er að um tuttugu manns hafi verið myrtir eða fangelsaðir á umræddu tímabili. Málið er sagt hið allra alvarlegasta sem komið hefur upp innan bandarískrar leyniþjónustu frá tímum Kalda stríðsins, þegar þeir Aldrich Ames frá CIA og Robert Hanssen frá FBI láku upplýsingum til Sovétríkjanna.