Segir íslensk tryggingafélög okra á bíleigendum því þau komist upp með það

Félag íslenskra bifreiðaeigenda segir bílatryggingar hér á landi allt frá helmingi til tvöfalt dýrari en á hinum Norðurlöndunum. Vísar félagið í eigin úttekt og segir engar skýringar á því hvers vegna munurinn sé svona mikill, íslenskum bíleigendum í óhag.

Skoðun á aðstæðum í Danmörku hafi leitt í ljós að þar séu bílar dýrari en hér á landi og laun svipuð. Samt séu íslensku bílatryggingarnar 57-97% dýrari en þær dönsku. Danskt tryggingafélag innheimti rúmlega 97 þúsund króna iðgjald á móti 153 til 192 þúsund króna iðgjaldi íslensku félaganna.

FÍB segir einu skýringuna þá að íslensk tryggingafélög okri á bíleigendum vegna þess að þau komist upp með það. Engin raunveruleg samkeppni ríki á milli félaganna og hafi aldrei gert.

Fjármálaeftirlit Seðlabankans beinlínis hvetji félögin til að hafa sem hæst iðgjöld.

„Þessum ofteknu iðgjöldum er safnað í tugmilljarða króna sjóði sem tryggingafélögin ávaxta í þágu eigenda sinna,“ segir í umfjöllun FÍB.

FÍB segist við skoðun sína hafa tekið hliðstæð dæmi um bíltegundir og fjölskylduaðstæður, til að fá sem réttastan samanburð. Óskað hafi verið eftir iðgjaldatilboðum í VW Golf annars vegar og Toyota RAV hins vegar.

Hér til hliðar má sjá töflu yfir iðgjöldin sem tryggingafélög á Norðurlöndunum buðu í Golfinn.