Ertu á kross­götum?

Upphaf nýs árs er góður tími til að líta til baka á farinn veg og velta fyrir sér því sem hefur áunnist. Sjálf hef ég gert það að venju að gera ákveðið stöðumat á sjálfri mér og farið yfir hverjir voru hápunktar ársins sem leið, hvað ég var ánægð með, og á hvaða sviðum ég vil bæta mig, og lagt þannig línurnar fyrir nýtt ár. 

Flestir kannast við tilfinninguna að standa á krossgötum, óvissir um hvaða leið skuli velja. Þetta gæti verið val á milli starfstilboða, að íhuga nýtt nám eða að stíga skref í átt að persónulegum vexti. Að standa á krossgötum getur verið yfirþyrmandi, þar sem hver leið gæti borið með sér bæði áhættu og umbun, og óttinn við að taka „ranga“ ákvörðun getur haldið okkur á óbreyttum stað. 

Til dæmis gæti sá sem leitar að starfi staðið frammi fyrir vali á milli öruggrar stöðu með stöðugleika eða áhættusamara en spennandi tækifæris í nýrri starfsgrein á nýjum vettvangi. Sá sem íhugar áframhaldandi nám gæti velt fyrir sér hvort það sé þess virði að leggja tíma og fé í það. Eða sá sem þráir persónulegan vöxt gæti fundið fyrir togstreitu á milli þess að vera áfram í þægindarammanum eða taka umbreytandi skref með tilheyrandi óvissu.

Hér eru nokkrar leiðir sem geta hjálpað við ákvarðanatökuna: 

• Settu þér skýr markmið: Gefðu þér tíma til að skilgreina hvað þú raunverulega vilt. Eru forgangsatriðin þín stöðugleiki, áskorun, fjárhagslegt öryggi eða persónuleg ánægja? Þegar þú hefur skilgreint markmiðin þín, verður valið auðveldara. 
• Skrifaðu kosti og galla: Settu niður kosti og galla hverrar leiðar fyrir sig. Þessi röklega nálgun getur gert valkostina skýrari. 
• Leitaðu innblásturs: Leitaðu til fyrirmynda eða lestu um fólk sem hefur tekið svipaðar ákvarðanir. Reynsla þeirra getur varpað ljósi á þinn veg. 
• Treystu innsæinu þínu: Stundum duga rök ekki ein og sér. Innsæi þitt getur verið lykillinn að því sem hentar þér best. 
• Sjáðu fyrir þér hverja leið: Ímyndaðu þér hvern valkost, t.d. ár fram í tímann. Hver þeirra vekur mestan áhuga og spennu? Hver samræmist gildum þínum best? 
• Fáðu álit: Ræddu hugsanir þínar við vini, fjölskyldu eða leiðbeinendur. Þeir gætu komið með sjónarhorn sem þú hefur ekki tekið eftir. 
• Byrjaðu smátt: Ef hægt er, prófaðu einn valkost í minni mæli áður en þú skuldbindur þig að fullu. Til dæmis skráðu þig á námskeið áður en þú byrjar í námi, eða prófaðu t.d. verktakavinnu áður en þú skiptir um starfsvettvang. 
• Fagnaðu ófullkomleikanum og lærðu af reynslunni: Engin ákvörðun er áhættulaus, og hver leið kennir okkur dýrmætan lærdóm. Treystu sjálfum þér og haltu áfram. 

Á krossgötum er mikilvægasta skrefið að taka eitt þeirra. Aðgerðir skapa skýrleika, og hver ákvörðun leiðir til vaxtar. Taktu áhættu, farðu út fyrir þægindarammann og treystu því að þú sért á réttri leið. 

Höfundur er sjálfstætt starfandi verkefnastjóri og nemandi í hugvíkkandi meðferðarfræðum (e. psychedelic therapy).