Skora á stjórnvöld að skoða áhrifin af hærra veiðigjaldi á Vestfirði

Lovísa Arnardóttir skrifar 7. maí 2025 16:08

Gylfi Ólafsson er formaður stjórnar Vestfjarðarstofu. Aðsend

Stjórn Vestfjarðastofu lýsir þungum áhyggjum af frumvarpi ríkisstjórnarinnar um hækkun á veiðigjaldi og væntanlegum áhrifum þess á atvinnulíf og samfélög á Vestfjörðum. Stjórnin skorar á stjórvöld að kanna áhrifin af hærra veiðigjaldi á samfélög á Vestfjörðum með ítarlegum hætti áður en frumvarpið er samþykkt.

Umræðu um frumvarp Hönnu Katrínar Friðriksson atvinnuvegaráðherra um veiðigjöld á sjávarútvegsfyrirtækin var frestað á Alþingi um klukkan tíu í gærkvöldi eftir tveggja daga umræðu.

Stjórn Vestfjarðarstofu segir í yfirlýsingu sinni það ljóst miðað við forsendur frumvarpsins að áhrifin verði geti orðið mjög íþyngjandi og geti komið afar hart niður á litlum og meðalstórum bolfiskútgerðum.

„Á Vestfjörðum eru eingöngu litlar og meðalstórar útgerðir í bolfiskveiðum og vinnslu. Þrátt fyrir að frítekjumark hafi verið hækkað, þá verður sú hækkun étin upp að miklu leyti upp vegna aukins þunga í gjaldtöku á þorsk og ýsu í nýjustu breytingum frumvarpsins. Misræmi milli útreikninga ráðuneytis og SFS verður að skýra til þess að hægt sé að treysta útreikningum vegna áhrifa af frumvarpinu,“ segir í yfirlýsingunni.

Þá segir enn fremur að miðað við greiningar Deloitte og fyrirtækjanna sjálfra á nýjustu ársreikningum Vestfirskra sjávarútvegsfyrirtækja sé hækkunin óásættanleg með tilliti til mögulegrar skerðingar á samkeppnishæfni og framlegð þessara fyrirtækja og að það verði að það verði að taka alvarlega áhyggjur forsvarsmanna fyrirtækjanna.

„Eftir miklar umræður undanfarnar vikur um hækkun veiðigjalda hefur ríkisstjórnin ekki svarað því hvernig staðinn verði vörður um samkeppnishæfni fyrirtækja og samfélaga á Vestfjörðum. Breytingum á frítekjumarki frá fyrstu drögum fylgja aðrar breytingar á útreikningum með tilheyrandi óvissu um endanlega niðurstöðu,“ segir í yfirlýsingunni og að aðrar íþyngjandi tillögur eins og innviðagjald á skemmtiferðaskip, kolefnisgjald og hækkun á sérstökum laxaskatti í ofanálag leggist ofan á allt annað og dragi úr „þeim viðnámsþrótti sem hefur einkennt síðustu ár á Vestfjörðum.“

Stjórnin skorar á stjórnvöld að bregðast hratt við og endurskoða tillögu um hækkun veiðigjalds og taki tillit til áhyggja atvinnulífs og sveitarfélaga á Vestfjörðum.

„Það er lágmarkskrafa að áhrifin af hærra veiðigjaldi á samfélög á Vestfjörðum verði könnuð með ítarlegri hætti áður en lengra er haldið,“ segir að lokum.

Sjávarútvegur Ríkisstjórn Kristrúnar Frostadóttur Alþingi

Tengdar fréttir

Alþingi hafi mistekist að tryggja þjóðinni eðlilegan hlut

Þingmenn takast enn á um nýtt frumvarp um veiðigjöld á þingi. Þingmaður Samfylkingarinnar segir Alþingi hafa mistekist að tryggja þjóðinni sinn hlut en það verði nú lagað. Þingmaður Sjálfstæðisflokksins segir að ekki megi skemma verðmætasköpun með álögum.

6. maí 2025 22:15

„Þetta er salami-leiðin“

Formaður Framsóknarflokksins vill frekar að þrepaskiptur tekjuskattur verði lagður á sjávarútvegsfyrirtæki heldur en að sjá frumvarp atvinnuvegaráðherra um veiðigjöld verða að veruleika. Slíkt kerfi vill hann meina að sé líklegra til að tryggja að stærri og efnameiri fyrirtæki sem hagnast mest greiði meira af auðlindinni til samfélagsins en lítil og meðalstór fyrirtæki. Hann telur áform ríkisstjórnarinnar „andlandsbyggðarlega“ „salami-aðferð“ til að sækja tekjur af greininni.

6. maí 2025 08:29

„Engin örugg skref, bara eitt illa unnið pennastrik“

Hildur Sverrisdóttir segir að ríkisstjórnin ætli að ráðast í stórkostlegar kerfisbreytingar á sjávarútvegi án greiningar og samráðs við sveitarfélög, lífeyrissjóði og fyrirtæki tengd sjávarútvegi. Forsætisráðherra segir það engin kúvending að mæla hlutina með réttari hætti en áður.

5. maí 2025 19:18

Mest lesið

Fleiri fréttir