Viðskipti erlent

Fresta reynsluflugi rafmagnsflugvélar

Kristján Már Unnarsson skrifar
Rafmagns-tvinnflugvél Heart Aerospace er talin geta rutt brautina fyrir sjálfbært og mengunarfrítt farþegaflug.
Rafmagns-tvinnflugvél Heart Aerospace er talin geta rutt brautina fyrir sjálfbært og mengunarfrítt farþegaflug. Heart Aerospace

Sænski flugvélaframleiðandinn Heart Aerospace hefur frestað fyrsta reynsluflugi HX-1 rafmagnsflugvélar sinnar fram á nýtt ár. Fyrirtækið hafði fyrir hálfu ári kynnt að fyrsta flugið yrði á síðasta fjórðungi þessa árs.

HX-1 er heiti á frumeintaki ES 30-rafmagnsflugvélarinnar, helstu vonarstjörnu fluggeirans um sjálfbært og mengunarfrítt atvinnuflug. Flugvélin gæti orðið sú fyrsta í kolefnisfríu áætlunarflugi hérlendis en Icelandair hefur með viljayfirlýsingu skráð sig fyrir fimm eintökum. Norræn flugfélög hafa sérstaklega horft til þessarar flugvélar fyrir flugleiðir innan Skandinavíu.

ES-30 flugvélin í litum Icelandair, sem skrifað hefur sig fyrir fimm eintökum með viljayfirlýsingu.Heart Aerospace

Það þótti álitshnekkir fyrir evrópska nýsköpun og þróunarstarf þegar Heart Aerospace, sem stofnað var í Gautaborg, ákvað síðastliðið vor að flytja höfuðstöðvar sínar til Kaliforníu. Skilaboðin voru túlkuð svo að Bandaríkin væru betri staður til nýsköpunar og tækniþróunar en Evrópa. Jafnframt ákvað fyrirtækið að taka frumeintakið í sundur og flytja það til Plattsburgh-flugvallar í norðanverðu New York-ríki þaðan sem áformað er að fyrstu reynsluflugin verði.

Stærð og flugdrægi vélarinnar gæti hentað íslensku innanlandsflugi.Heart Aerospace

Heart Aerospace hafði stefnt á fyrsta flugið á öðrum fjórðungi þessa árs. Flutningurinn til Bandaríkjanna varð til þess að fyrirtækið endurskoðaði þá tímaáætlun og sagði að flugvélin myndi ekki taka á loft fyrr en undir lok þessa árs. Einnig kom fram að endursmíða þyrfti vængina vegna vandamála tengdum koltrefjaefnum.

Flugfréttasíðan FlightGlobal vekur athygli á því að Anders Forslund, stofnandi og forstjóri Heart Aerospace, greini frá því í nýju kynningarmyndbandi að fyrsta flugtakið verði „snemma á næsta ári“. Engin skýring er gefin á seinkuninni og hefur Heart ekki svarað fyrirspurnum vefmiðilsins.

Heart hyggst smíða annað tilraunaeintak, HX-2, í nýrri verksmiðju sem reisa á í El Segundo í Kaliforníu þar sem ES 30-flugvélin verður þróuð áfram. Hún er hönnuð til að flytja 30 farþega á allt að 200 kílómetrum löngum flugleiðum eingöngu á rafmagni, eða 25 farþega á allt að 800 kílómetra flugleiðum með „hybrid“ eða tvinnorku.

Stór hópur flugfélaga hefur gert skuldbindandi pantanir í 250 eintök og viljayfirlýsingar eru um nærri 200 eintök. Fyrirtækið stefnir að því að flugvélin verði búin að fá vottun og komin í farþegaflug árið 2029.

Hér má sjá frétt Stöðvar 2 daginn sem fyrsta tilraunaeintakið var kynnt í Gautaborg í september í fyrra:

Fréttir af flugi Loftslagsmál Orkumál Orkuskipti Umhverfismál Nýsköpun Tækni Bandaríkin Svíþjóð Icelandair

Tengdar fréttir

Yfirgefa Svíþjóð til að hraða þróun rafmagnsflugvélar

Sænski flugvélaframleiðandinn Heart Aerospace hefur ákveðið að flytja höfuðstöðvar sínar frá Gautaborg í Svíþjóð til Los Angeles í Kaliforníu. Fyrirtækið segir að með þessu sé ætlunin að efla þróun ES 30-rafmagnsflugvélarinnar og styðja betur við fyrirhugað tilraunaflug.

Þessi Airbus gæti flogið á íslenskri orku til Oslóar

Ráðamenn Airbus hafa ítrekað þá stefnumörkun sína að koma eitthundrað sæta flugvél knúinni mengunarlausu eldsneyti í arðbært farþegaflug á næsta áratug. Þetta kom fram á árlegum fundi forystumanna Airbus á dögunum.

For­setinn fyrstur far­þega í raf­magns­flug­vél

Blað var brotið í íslenskri flugsögu í gær með fyrsta farþegaflugi rafmagnsflugvélar hér á landi. Forseti Íslands og forsætisráðherra voru fyrstu farþegar vélarinnar og segja flugið marka vatnaskil í vegferð Íslands í átt að hreinni orku í loftsamgöngum. 

Flugvél flýgur í fyrsta sinn í sögunni á íslenskri raforku

Fyrsta rafmagnsflugvél Íslendinga hóf sig til flugs í fyrsta sinn á Íslandi nú síðdegis frá flugvellinum á Hellu á Rangárvöllum. Þetta var jafnframt í fyrsta sinn sem flugvél flaug á íslenskri orku en ekki innfluttu jarðefnaeldsneyti.



Mest lesið


Fleiri fréttir

Sjá meira


×

Mest lesið