Khamenei sagður látinn

Agnar Már Másson skrifar 28. febrúar 2026 19:43

Ayatollah Ali Khamenei, æðsti leiðtogi Íran, er sagður látinn eftir umfangsmiklar loftárásir Ísraelsmanna og Bandaríkjamanna á Íran í dag. Aðsetur hans í Teheran var lagt í rúst í árásunum.

Bæði Channel 12 í Ísrael og bandaríski miðillinn Reuters hafa þetta eftir ónafngreindum háttsettum ráðamönnum í Ísrael.

Channel 12 skrifar enn fremur að Benjamín Netanjahú, forsætisráðherra Ísraels, hafi fengið að sjá ljósmynd af líki æðstaklerksins eftir að það hafi fundist í rústunum þar sem aðsetur hans var áður.

Ekkert hefur heyrst frá Khamenei frá því að Bandaríkjamenn og Ísraelsmenn hófu umfangsmiklar loftárásir á svæði víðsvegar í Íran í morgun, þar á meðal á aðsetur æðstaklerksins. Hið minnsta tvö hundruð létust í árásunum í Íran og á áttunda hundruð særðust til viðbótar, að sögn Rauða hálfmánans í Íran.

Örlög æðsta klerksins hafa verið óljós frá því að árásirnar hófust um klukkan sex í morgun að íslenskum tíma. Fyrr í kvöld sagðist utanríkisráðherra Írans ekki vita betur en að Khamenei væri á lífi, sem og forseti landsins, Masoud Pezeshkian. Nokkru síðar sagði Netanjahú að líklegt væri að „harðstjórinn“ Khamenei væri dáinn.

Fréttin verður uppfærð.

- Árásirnar hófust rétt rúmlega sex, að íslenskum tíma, og eru þær sagðar eiga að standa yfir í að minnsta kosti einhverja daga.

- Hið minnta 200 eru látnir í Íran að sögn íranska Rauða hálfmánans og ríflega 700 taldir særðir.

- Bæði Donald Trump og Benjamín Netanjahú segja markmiðið að koma í veg fyrir að klerkastjórnin í Íran komi upp kjarnorkuvopnum og sömuleiðis vilji þeir koma stjórninni frá völdum.

- Árásir á Íran hafa legið í loftinu um nokkuð skeið, þar sem Bandaríkjamenn hafa sent umtalsverðan herafla á svæðið. Á sama tíma hafa átt sér stað viðræður um kjarnorkuáætlun Írana, sem Bandaríkjamenn hafa viljað stöðva.

- Íranar hafa skotið eldflaugum að Ísrael og að öðrum nágrannalöndum eftir árásir Ísraela og Bandaríkjamanna.

- Miklar vangaveltur hafa verið uppi um ástand Ali Khamenei, æðstiklerks Írans. Aðsetur hans í Teheran var lagt í rúst. En hann var þó sagður hafa verið sendur í öruggt skjól. Aftur á móti telja Ísraelsmenn líklegt að hann sé dáinn.

Íran Ísrael Bandaríkin Donald Trump

Mest lesið

Fleiri fréttir