Kaup Netflix á hluta Warner Bros. gætu reynst „vanda­mál“

WBD rekur sjónvarpsstöðvar eins og CNN, Discovery, TNT HBO og fleiri auk þess sem það rekur kvikmyndatökuver og streymisveituna HBO Max, svo eitthvað sé nefnt.

Forsvarsmenn Warner hafa samþykkt 72 milljarða dala (um 9,2 billjónir króna) kauptilboð Netflix í kvikmyndaver og streymisveitu fyrirtækisins. Sjónvarpsstöðvar og fréttastöðvar Warner yrðu ekki með í kaupunum en Netflix fengi meðal annars HBO Max, DC Studios og umfangsmikið safn af sjónvarpsefni og kvikmyndum.

Eigendur Paramount höfðu reynt að kaupa WBD í heild sinni en það vildu forsvarsmenn fyrirtækisins ekki samþykkja.

Sjá einnig: Paramount, Comcast og Netflix vilja kaupa Warner

Netflix er með langmesta markaðshlutdeild meðal streymisveita í heiminum. Í lok síðasta árs voru áskrifendur fyrirtækisins um 320 milljónir talsins en þá hættu forsvarsmenn fyrirtækisins að veita upplýsingar um fjölda áskrifenda.

Í lok september voru áskrifendur Warner Bros. Discovery um 128 milljónir, samkvæmt frétt Wall Street Journal.

Trump var spurður út í kaupin í gærkvöldi og sagði forsetinn að þau gætu orðið „vandamál“: það væri ekki spurning. Hann sagðist ætla að taka virkan þátt í að taka ákvörðun um það hvort yfirvöld Bandaríkjanna myndu samþykkja kaupin, samkvæmt AP fréttaveitunni.

Þá sagði Trump að kaupin þyrftu að fara gegnum ákveðið ferli og sjá þyrfti hvað kæmi út úr því en hann tók fram að Ted Sarandos, forstjóri Netflix, væri frábær og að þeir hefðu hist í Hvíta húsinu í síðustu viku.

Reed Hastings, annar stofnanda Netflix, var ötull stuðningsmaður Kamölu Harris, mótframbjóðanda Trumps í forsetakosningunum í fyrra.

Ætla ekki að sameina veiturnar strax

Eins og fram kemur í frétt WSJ hafa forsvarsmenn streymisveitna verið að hækka áskriftarverð að undanförnu, samhliða aukningu í útgjöldum vegna framleiðslu sjónvarpsefnis og því að dregið hefur úr fjölgun nýrra áskrifenda. Þetta á bæði við Netflix og HBO Max.

Úr höfuðstöðvum Netflix hefur heyrst að ekki standi til að sameina streymisveiturnar strax eftir að kaupin ganga í gegn. Notendur þyrftu því áfram, í það minnsta í einhvern tíma, að halda áfram að greiða fyrir báðar streymisveiturnar.

CNBC segir að fjárfestar Netflix virðist ekki hafa tekið fregnum af kaupunum allt of vel, miðað við það að virði hlutabréfa fyrirtækisins lækkaði um 2,89 prósent eftir að tilboðið var samþykkt. Einn greinandi sagði við blaðamann miðilsins að það væri kristaltært að kaupin myndu í fyrstu koma niður á Netflix. Upphæðin væri það mikil.

Virði hlutabréfa WBD hækkuðu um 6,3 prósent.

Ein af ástæðum þess að forsvarsmenn Warner Bros. Discovery ákváðu að skipta fyrirtækinu upp og leita kaupenda er að reksturinn hefur gengið erfiðlega eftir að Warner Bros. og Discovery Inc. sameinuðust árið 2022. Sameiningin kostaði mikið og fyrirtækið varð mjög skuldsett í kjölfarið.