Samningar ríkis og sveitarfélaga við aðildarfélög Kennarasambands Íslands hafa verið lausir síðan 31. mars annars vegar og 31. maí hins vegar. Viðræður hafa staðið yfir í nokkra mánuði og var deilunni vísað til ríkissáttasemjara 24. september.
Boðað hefur verið til verkfalls í fjórum leikskólum, þremur grunnskólum og einum framhaldsskóla. Verkföllin á leikskólunum hefjast 29. október og eru ótímabundin, í grunnskólum frá 29. október til 22. nóvember og frá 29. október til 20. desember í FsU.
Þá stendur yfir atkvæðagreiðsla um verkfall í einum tónlistarskóla, sem ekki er búið að tilkynna hver er, og mun það vera frá 29. október til 20. desember. Niðurstaða fæst í þeirri atkvæðagreiðslu síðdegis á morgun.
Fjárfest verði í kennurum
Í leik og grunnskólum voru verkfallsaðgerðir samþykktar með 100 prósentum atkvæða og með 82 prósentum í FsU. Formaður Kennarasambands Íslands segir skilaboðin skýr.
„Nú getum við bara ekki beðið lengur og því miður þá hefur okkur fundist deilan vera á þeim stað að fólk þurfi að greina þá alvöru sem við horfum til í að nú komi samfélagið og fjárfesti í kennurum og efli faglegt starf og stöðugleika í skólakerfunum okkar,“ segir Magnús Þór Jónsson, formaður KÍ.
„Okkar markmið er það að okkar sérfræðingar í skólunum séu með sambærileg launakjör og sérfræðingar á almennum markaði.“
Nú hafi samningsnefndir nítján daga til að ná smaan áður en til aðgerða kemur.
Kemur til greina að boða til frekari verkfallsaðgerða?
„Einn möguleikinn er vissulega sá að fleiri skólar hugsi sér til hreyfings varðandi það að taka þátt í aðgerðunum.“
Sáttur ef hann fær allar einingarnar fyrir önnina
Viðbrögð nemenda við fréttunum eru misjöfn.
„Fyrstu viðbrögðin eru „Jess, þrjár vikur í frí. Partý.“ En þá tefjumst við um þrjár vikur. Það hefur áhrif á hvaða menntaskóla við komumst í og námið sem við fáum. Það er alveg erfitt að vinna upp þriggja vikna nám,“ segir Sóley Anna Myer, nemandi í Laugalækjaskóla.
Hún hefur áhyggjur af því að missa úr námi en finnur þó til með kennurunum.
„Mér finnst þetta nauðsynlegt fyrir þau. Mér finnst þetta gott fyrir þau því þetta þarf að breytast. En þetta bitnar á börnunum. Semjið við kennarana,“ segir Sóley.
Samnemandi hennar Sturlaugur Hrafn Ólafsson var ögn slakari. Hann horfir á þetta sem þriggja vikna frí sem hann myndi nýta í að gera góða hluti.
„Bara rífa sig í gang þegar verkfallið er búið ef það kemur. Annars bara áfram gakk,“ segir Sturlaugur.
Benjamín Óli Ólafsson nemandi í FsU segir kennara eiga skilið að fá hærri laun. Hann er á báðum áttum með hvað honum finnst um verkfallið.
„Ef ég fæ allar einingarnar sem ég á að fá fyrir þessa önn þá er ég sáttur, annars ekki,“ segir Benjamín.
